Bihar, maiatzak 3, “Euskal Eskola Publikoa haratago” izeneko dokumentua aurkeztuko dugu EHIGE, BIHE eta SAREAN elkarteek. EHUk Bilbon daukan Paraninfoan (Abandoibarra, 3) izango da aurkezpena 10:00etatik 14:00etara bitartean. Gure ustez Euskal Eskola Publikoak dituen erronka garrantzitsuenak jasotzen ditu dokumentu honek. Aurkezpenera joan nahi baduzu, eman baieztapena helbide honetan. Ikusi dokumentua: HARATAGO
Ekainaren 3an ospatuko da Larraulen (Gipuzkoa) Eskola Txikien 25. Jaia “Eskola Txikiak 25 urtez bizirik” lelopean. 2007an errekuperatu zuen Larraulek eskola, 1977tik itxita egon eta gero. Gaur egun 2tik 8 urtera bitarteko 25 ikasle ditu eta eskaintza zabaltzeko lanean jarraitzen dute. Hona hemen Jaiari buruzko informazioa eta hemen prentsak jaso duena.
Jose Ignacio Wert Espainiako Hezkuntza Ministroak ezarri nahi dituen murrizketen kontrako prentsa oharra bidali du EHIGEk komunikabideetara. Hemen duzue: EHIGE-murrizketak
Apirilaren 27an amaituko da Guraso Elkarteen Hezkuntza-jarduera onen II. lehiaketan parte hartzeko epea. Beraz, oraindik ez badituzue bidali zuen egitasmoak, has zaitezte lanean, elkarte batzuk ari dira eta euren lanak bidaltzen. Dakizuenez, hiru sari banatuko ditugu Euskal Eskola Publikoaren Jaian (Zarautzen, ekainaren 10ean), 1.500 eurokoa lehena, 1.000 eurokoa bigarrena eta 500 eurokoa hirugarrena. Web gune honetan dituzue informazio guztia eta jarduera bidaltzeko e-maila. Elkarren lanak ezagutzeko eta konpartitzeko aukera ezin hobea dugu hau, beraz, animo!
Etxeko lanen kontrako kanpaina hasi du Frantziako Gurasoen Kontseiluen Federazioak (FCPE) hamabost eguneko greba batekin eta Espainiako Estatuko Gurasoen Konfederazioak (CEAPA) bat egin du azken urteetan etxeko lanen kopurua handitu dela salatuz. Estatu Batuetan ere ohiko eztabaida da (ikus The case against homework) eta Nafarroako Eskola Kontseiluak aztertu zuen gaia pasa den ikasturtean.
Hauek dira CEAPAk ematen dituen arrazoiak:
-Hezkuntza-sistemaren porrota irudikatzen dute hein handi batean, ikasleak eskolan landu beharko lituzketen zereginekin gainkargatzen dituztelako.
-Gizarte-desberdintasunak sortzen dituzte: ikasleak familia eta inguruaren arabera egingo ditu hobeto edo gaizkiago etxeko lanak. Guraso batzuk seme-alabei laguntzen saiatuko dira, beste batzuk akademietara bidaliko dituzte eta askok ez dute ez mailarik ezta dirurik izango ez bata ez besterako.
-Tentsioak sortzen dituzte guraso eta seme-alaben artean. Askotan, jolastu gabe geratzen dira ikasleak etxeko lanak egiteko, eta horrek errefusa sortzen du. Ikasleek jakin egin behar dute zeintzuk diren euren eginbeharrak, baina jolasteko denbora ere izan behar dute.
-Arazoak sortzen dizkie gurasoei, berandu ateratzen direlako lanetik eta ez daukatelako denborarik.
-Ikasleek denbora behar dute bestelako jardueretako (kirola, kultura, aisia), horiek ere garrantzitsuak direlako garapen pertsonalerako.
Hemen duzu dokumentu osoa eta proposatzen dituzten alternatibak.
Radio Euskadin ere eztabaidatu dute gai honen inguruan. Hemen duzu.
Zer deritzozu zuk? Zein da egoera gurean?
Elebitasunaren abantailei buruzko sentsibilizazio kanpaina egiten ari da Ikas-bi Iparraldeko eskoletan, Gilbert Dalgalian psiko-hizkuntzalariaren eskutik. Hona hemen egitaraua: Dalgalianen hitzaldiak
Gaur aurkeztuko da “Bale!” abestia Zarauzko Orokieta Eskolan. Xabier Euzkitzek egin du letra eta Antxon Sarasuak musika. Eskolako guraso, ikasle eta irakasleek jarri diote ahotsa eta musika honako hauek: Bixente Martinez (gitarra eta mandolina), David Gorospe (bateria), Igor Gartzia (txistu txikia), Antxon Sarasua (baxua eta eskusoinua). Andoaingo Neurotika estudioetan grabatu eta nahastu da Aitor Carrasquedo teknikariarekin.
Hemen dituzue Abestiaren hitzak eta Bale! abestia (mp3) Hasi bada abesten!!!
Arrazakeriaren kontrako eguna ospatzen da gaur. Horren harira, Arrazakeria eta Xenofobiaren kontrako martxa antolatu da igande honetarako. Hona hemen gairi buruzko dokumentazio interesgarria: Nola lagun dezakegu gurasook arrazakeria eta indarkeria erauzten kirolean? (gaztelaniaz), kirol-begiraleentzako gida (gazt.) eta atzerriko familiak hartzeko gida (gazt.)
2011ean egindako Ebaluazio Diagnostikoaren emaitzak argitaratu ditu ISEI Irakas-Sistema Ebaluatu eta Ikertzeko Erakundeak. Ikastetxe publiko eta hitzartuetako Lehen Hezkuntzako 4. mailako eta DBHko 2. mailako ikasleen gaitasunak ebaluatu ditu lau arlotan: matematika, euskara, gaztelania eta ingelesa. Hirugarren aldiz egin da ebaluaketa hau eta 2011ean, aurreneko aldiz, ingelesa ebaluatu da.
Hauek dira ondorio batzuk:
-Matematika-konpententzia: 5 puntu igo da 2009tik LHko 4. mailan eta mantendu egin da DBHko 2. mailan. Lehen Hezkuntzan igo egin da maila aurreratuan dagoen ikasleen portzentaia (%39,4) eta behera egin du hasierako mailakoak (%11,5); DBHn igo egin dira hasierako mailan (%16,1) eta maila aurreratuan dauden ikasleen portzentaiak (%26,4) .
-Gaztelaniazko hizkuntza-komunikaziorako konpetentzia: LHko 4. mailan 6 puntu igo da, jeitsi egin da hasierako mailan dagoen ikasleen portzentaia (%11,3) eta mantendu egiten da maila aurreratukoen portzentaia (%27,4). DBHko 2. mailan 4 puntu hobetu da eta jeitsi egin da hasierako mailan dagoen ikasleen portzentaia (%11,9).
-Euskarazko hizkuntza-komunikaziorako konpetentzia: LHn 6 puntu hobetu da, jeitsi egin da hasierako mailan dagoen ikasleen portzentaia (%30) eta igo maila altuan dagoenena (%32,7). D ereduan ere ikasleen %23 dago hasierako mailan. DBHn 6 puntu igo da puntuazio orokorra eta jeitsi hasierako mailan dagoen ikasleen portzentaia (guztiaren %36 eta D ereduko ikasleen %24,7).
-Ingelesezko hizkuntza-komunikaziorako konpetentzia: LHko 4. mailako ikasleen %77ak eta DBHko 2. mailako %83ak hasierako maila gainditzen du; LHko ikasleen %30ak eta DBHkoen %43,6ak eskolaz-kanpoko ekintzetan parte hartzen du, ondorioz, emaitza hobeak ditu.
-Indize sozioekonomikoa (ISEK): desberdintasun handiak daude sareen artean eta areagotzen ari dira urtetik urtera.
-Errepikapenak: ikasturteren bat errepikatu duten ikasleek emaitza txarragoak izaten dituzte.
-Etxeko hizkuntzaren eragina: emaitzak hobeak dira etxeko hizkuntza eta azterketarena berdinak direnean; alde handiena Matematiketan dago.
-Sexuaren araberako emaitzak: neskek emaitza hobeagoak lortzen dituzte hizkuntz-konpetentzietan, mutilak hobeak dira Matematiketan.
Puntuazioa igo egin da konpetentzia guztietan. Hala ere, oraindik ikasle kopuru handia dago (%30etik gora) euskararen hasierako mailan, baita D ereduan ere, Eskola Kontseiluak egindako 2008-2010 txostenak dioen moduan. Inglesezko eskolaz-kanpoko ekintzek ere eragin handia dute emaitzetan. Bestalde, argi agertzen da Ebaluazio Diagnotikoan ikasturtea errepikatzeak ez dituela hobetzen emaitzak, honek berretsi egiten du Hezkuntzaren ekitatea eta kalitateari buruzko txostenean ELGA-k esaten duena. Txosten honek zera gomendatzen du ere: “ikastetxearen aukeraketa kudeatu beharra bereizketa eta desberdintasunak ez daitezen hasi”. Horixe erakusten du baita Ebaluazio Diagnostikoak, ISEK altuena dutenak mota bateko ikastetxeetan biltzen bait dira.
Hezkuntza-praktika hobetu eta ikasle guztientzako ekitatea bermatu nahi badugu, behar beharrezkoa da ikastetxeek lehenbait lehen izatea emaitzak euren hobekuntza planak egokitu ahal izateko (aurten ez da ebaluaketarik egingo) eta nola ez, emaitza hauek kontuan izatea hezkuntzari dagozkion politikak diseinatzerakoan.
2008-2010 urteei dagokien EAEko hezkuntzaren egoerari buruzko txostena argitaratu du Euskadiko Eskola Kontseiluak. Lau atal ditu: plangintza, ebaluazioa, irakasleen prestakuntza eta ikastetxeetako berrikuntza, finantziazioa eta baliabideak. 0-2 urte bitarteko eskaintza publiko falta 12 udalerritan (Bizkaiko 10), euskara maila eskasa eta finantziaketa handitzeko beharra (EAEn BPGren %3,2 inbertitzen da eta Europan %7 bataz beste) azpimarratu ditu, besteak beste, hezkuntza-eragileek osatzen duten kontsultarako organo honek.
